
Emé soun climat tempera tout de long de l’annado, sei plajo, sei païsàgi espetaclous e soun patrimòni culturau sènso parié, la Mare Nostrum, nouesto mar, dei Rouman a tout pèr atriva lei vouiajaire, acò despui qu’espeliguè lou tourisme tre la fin dóu siècle 18èime sus la coustiero prouvençalo e sus la riviera italiano ! Soun aigo bluio a ja fa pantaia lei pintre (Courbet, Van Gogh, Matisse...), leis escrivan (Dumas, Lamartine, Mistral...), tout autant que lei touristo d’ièr, de vui … emai de deman.
En 2018, la grando bluio acuiè quàsi 350 milien de vesitaire, siegue 30 % de toui lei touristo internaciounalo qu’arribon dins lou mounde entié. Uno trevanço que va creissènt despui mai de 40 an em’un trin que s’abrivo que mai. Segound d’estimacien de l’Ourganisacien moundialo dóu tourisme (OMT), alor qu’en 1978 Mieterrano coumtavo 58 milien d’arribado internaciounalo, en 2030, soun toutun agantara lei 500 milien. Aquelo ativeta fa travaia foueço gènt dins la regien : segound un raport publica en 2015 pèr lou Counsèu moundiau dóu tourisme e dei vouiàgi (WTTC), lou tourisme recampo aperaqui 12 % de l’emplé en Mieterrano e lou seitour fa 11,5 % dóu Proudu Interiour Brut (PIB) dóu gros relàrgui.
Ai las ! Leis ativeta ligado au tourisme, majamen de masso (crousiero e ativeta balneàri), vènon agrava que mai un envirounamen deja trantaiant, e mume tant l’avali dins uno pountannado que lou climat vèn fada : urbanisacien de la touto pèr respouendre ei besoun creissènt dei poupulacien (oustau, equipamen, trasport, ativeta endustrialou-pourtuàri…), amermamen deis espàci pèr l’agriculturo e lei fourèst, lou subre-counsume d’aigo bevablo e d’eleitricita (climatisacien, caufàgi), esplecho sóuvajo de l’animalun e dóu flourun ja bèn entrepacha pèr l’augo caulerpa taxifolia qu’es mai resistènto en mitan mieterran qu’en mitan troupicau d’ounte vèn (fuguè aducho en 1983 pèr lou Musèu ouceanougrafi dóu Mounègue que fasié la vuidanço de sei bacin), poulucien marino e d’aigo douço de touto meno que s’apren eis aigo embrutido rejitado emai ei bourdihié sóuvàgi d’uno moulounado de bourdiho soulido qu’es pas de crèire…
Mai, vouguessian que nouesto mar Mediterragno countunièsse de nous fa viéure emai pantaia, nous fau l’apara sènso plus ges de relàmbi coumo nouesto planèto tout court. Li a fouèço gènt qu’à soun nivèu (proufessiounau, poudé publi, counsumaire…) an pres counsciènci d’aquéleis enjue envirounamentau e que si boulègon…
Pamens, emai siguèsse jamai tròup tard pèr bèn faire, cadun saup qu’em’un proublèmo parié, faudrié que si bouleguessian tóutis ensèn soulide pèr trouba uno soulucien duradisso… en gardant coumo amiro de leissa lei generacien avenidouiro dorbi enca longtèms aquelo fenèstro qu’es Prouvènço pauvado sus 835 km de tra de coustiero e prouficha d’uno mar propro emai vivènto !
Jan-Miquèu Turc
Proufessour certifica de lingo prouvençalo
Majourau dóu Felibrige
Cartouneto d’identita de la mediterragno (dialèite maritime)
- Etimoulougié : Medius terrae, mar au mitan dei terro
- Superficìo : 2 510 000 km2 (siegue 5 fes la Franço), 1 % de l’oucean moundiau
- Bacin : lou bacin levantés e lou bacin pounentés, dessepara pèr un mountagnàgi souto-marin que s’esperlongo entre Sicilo e Tunisìo
- Founsour mejano : 1 500 m
- Founsour massimalo : 5 121 m (founsau de Matapan au miejour estrème de la Grèço)
- Marèio : 30 cm en mouieno, partènt dóu zèro foundamentau baia pèr lou maregrafe de Marsiho
- Voulume d’aigo : 3 700 000 km3, siegue un cube de 1 900 km de coustat
- Salineta : 38 ‰ (mai que l’Atlanti à 33 ‰ e mèns que la mar Mouarto à 270 ‰)
Tèms pèr renouvela leis aigo : 90 an - Coustiero : 46 000 km de couesto, que quàsi la mita rapresènto l’entour deis isclo
- Flùvi : 69 que Rose n’en fa partido e nouèstei flùvi coustié (Var…)
- Animalun e flourun : 7 500 espèci animalo e 1 000 espèci vegetalo